ថៃឡង់ដ៍៖ ស្រ្តីជនជាតិចិនម្នាក់ ត្រូវក្រុមជនល្មើសជាបុរសចំនួន ៤នាក់ ប្រើប្រាស់អំពើហិង្សា និងចាប់ជំរិតចេញពីសណ្ឋាគារមួយកន្លែងក្នុងទីក្រុងបាងកក កាលពីថ្ងៃទី២៣ ខែសីហា ដោយបានចងដៃស្ត្រីជនរងគ្រោះ និងបង្ខំឱ្យឡើងរថយន្តសំដៅទៅកាន់តំបន់ព្រំដែនថៃ-មីយ៉ាន់ម៉ា។ លុះពេលរថយន្តធ្វើដំណើរមកដល់ខេត្តកំពែងពេជ្រ (Kamphaeng Phet) ស្រ្តីរងគ្រោះបានសម្រេចចិត្តប្រឈមមុខនឹងគ្រោះថ្នាក់ ដោយលោតចេញពីរថយន្តដែលកំពុងបើកបរ រួចរត់ទៅសុំជំនួយពីអ្នកស្រុកនៅក្នុងតំបន់នោះ មុនពេលសមត្ថកិច្ចបញ្ជូននាងទៅព្យាបាល និងពិនិត្យសុខភាពនៅឯមន្ទីរពេទ្យ។ បន្ទាប់ពីទទួលបានការសុំជំនួយ សមត្ថកិច្ចបានបើករថយន្តដេញតាមស្ទាក់រថយន្តម៉ាក Nissan Teana ពណ៌ខ្មៅ របស់ក្រុមជនសង្ស័យដែលបានបើករត់គេចពីចំណុចត្រួតពិនិត្យ រហូតបណ្តាលឱ្យផ្ទុះកង់រថយន្តមួយចំហៀងរបស់ជនសង្ស័យនៅក្នុងស្រុកឡានដុកម៉ៃ (Lan Dok Mai) ។ បន្ទាប់មក សមត្ថកិច្ចក៏បានឈានទៅដល់ការឃាត់ខ្លួនជនសង្ស័យជាជនជាតិថៃចំនួន ២នាក់ ឈ្មោះ សុមគៀត (Somkiat) អាយុ ៤១ឆ្នាំ និងឈ្មោះ គីតធីផន (Kittiporn) អាយុ ២៤ឆ្នាំ ខណៈជនសង្ស័យ ២នាក់ផ្សេងទៀតបានលោតចុះពីរថយន្តរត់គេចខ្លួនចូលព្រៃបាត់ស្រមោល ខណៈមន្ត្រីបានស្គាល់អត្តសញ្ញាណម្នាក់ក្នុងចំណោមអ្នកដែលរត់គេចខ្លួននោះ ។ ទន្ទឹមនឹងនោះ ជនសង្ស័យបានសារភាពថា ពួកគេមានបំណងនាំស្រ្តីរងគ្រោះទៅកាន់ស្រុកម៉ែសូត (Mae Sot) ក្នុងខេត្តតាក (Tak) ជិតព្រំដែនមីយ៉ាន់ម៉ា ខណៈសមត្ថកិច្ច កំពុងសម្របសម្រួលផ្តល់កិច្ចការពារដល់ជនរងគ្រោះ និងបន្តស៊ើបអង្កេតស្វែងរកមូលហេតុពិតប្រាកដ ៕