នាថ្ងៃទី២០ ខែវិច្ឆិកានេះ គ្រុឌ បានត្រៀមរួចរាល់ ដើម្បីធ្វើដំណើរទៅកាន់ប្រទេសក្រិក ដើម្បីរៀបចំការប្រកួតជើងឯកគ្រុឌគុនខ្មែរ កម្ពុជា-ក្រិក ឆ្នាំ២០២៤ ដែលសហការជាមួយសហព័ន្ធកីឡាប្រដាល់គុនខ្មែរ។ នេះជាលើកដំបូងហើយ ដែលភេសជ្ជៈគ្រុឌ បានរៀបចំការប្រកួតគ្រុឌគុនខ្មែរលក្ខណៈអន្តរជាតិ នៅប្រទេសក្រិក។ ក្នុងការរៀបចំនេះ មានទាំងភ្លេងប្រពៃណីខ្មែរ គ្រូបង្វឹក កីឡាករ កីឡាការិនី ក្រុមការងារបច្ចេកទេស និងអ្នកចូលរួមមួយចំនួនទៀត។ ភេសជ្ជៈគ្រុឌ ជាអ្នកទទួលបន្ទុកក្នុងការរៀបចំការប្រកួតនេះ។ ជាធម្មតា គ្រុឌគុនខ្មែរតែងតែប្រកួតនៅក្នុងប្រទេស។ ដូច្នេះ នេះគឺជាប្រវត្តិសាស្ត្រថ្មីមួយទៀត ដែលភេសជ្ជៈគ្រុឌ បានសហការជាមួយសហព័ន្ធប្រដាល់គុនខ្មែរ និងសហព័ន្ធក្រិក ដើម្បីរៀបចំការប្រកួតគ្រុឌគុនខ្មែរនៅប្រទេសក្រិក។ នេះក៏ជាការរួមចំណែកដ៏ធំមួយ លើវិស័យកីឡាប្រដាល់គុនខ្មែរ នៅលើឆាកអន្តរជាតិ ដើម្បីបង្ហាញឱ្យពិភពលោកបានឃើញពីគុនខ្មែរកាន់តែច្បាស់ និងបញ្ជាក់ថា គុនខ្មែរពិតជាមានភាពខ្លាំងក្លាដូចដែលគេនិយាយមែន។ ក្រុមការងារភេសជ្ជៈគ្រុឌ និងកីឡាករ កីឡាការិនីទាំង៨រូប បានត្រៀមខ្លួនរួចរាល់ ដើម្បីធ្វើឱ្យតំបន់អឺរ៉ុប បានស្គាល់ពីក្បាច់គុនខ្មែរ ក្នុងការផ្សព្វផ្សាយគុនខ្មែរឱ្យកាន់តែមានភាពលេចធ្លោ។ ទោះការប្រកួតនេះចាញ់ឬឈ្នះ កីឡាគឺជាមិត្តភាព។ កម្ពុជា និងក្រិក សុទ្ធតែជាប្រទេសដែលមានវប្បធម៌ និងអរិយធម៌វ័យចំណាស់ដូចគ្នា។ ជាពិសេស គ្រុឌនឹងជំរុញឱ្យកីឡាករខ្មែរ មានឱកាសចេញទៅប្រកួតនៅក្រៅប្រទេសបានកាន់តែច្រើន ដើម្បីដកស្រង់បទពិសោធន៍ និងអភិវឌ្ឍខ្លួនបន្ថែមទៀត សម្រាប់អនាគត។ #គ្រុឌគុនខ្មែរ ថែរក្សាអត្តសញ្ញាណខ្មែរ នាំគុនខ្មែរឱ្យល្បីលើឆាកអន្តរជាតិ! #គាំទ្រគុនខ្មែរជាមួយគ្រុឌ