ប្រធានាធិបតីបារាំងលោក Emmanuel Macron បាននិយាយថា ឥណ្ឌាគឺជាសម្ព័ន្ធមិត្តដ៏សំខាន់សម្រាប់ប្រទេសបារាំងនិងទ្វីបអឺរ៉ុប។ លោក Macron បានធ្វើការអត្ថាធិប្បាយបែបនេះនៅក្នុងសន្និសីទសារព័ត៌មានរួមគ្នាមួយជាមួយនាយករដ្ឋមន្រ្តីឥណ្ឌាលោក Narendra Modi ដែលលោកគឺជាសហម្ចាស់ផ្ទះនៃកិច្ចប្រជុំកំពូលប៉ារីស AI ។ ប្រធានាធិបតី​ លោក​ Macron បានប្រាប់អ្នកសារព័ត៌មានថា "អ័ក្សរវាងឥណ្ឌូប៉ាស៊ីហ្វិក និងសហភាពអឺរ៉ុប ខ្ញុំគិតថាវាមានន័យច្រើន ព្រោះវាបង្កើតតំបន់នៃកិច្ចសហប្រតិបត្តិការរវាងប្រទេសមហាអំណាច"។ មេដឹកនាំទាំងពីរកំពុងធ្វើដំណើរទៅកាន់ទីក្រុង Marseille (ម៉ាក់សី) ភ្លាមៗបន្ទាប់ពីបញ្ចប់សន្និសីទសារព័ត៌មាននៃកិច្ចប្រជុំទ្វេភាគី។ កិច្ចប្រជុំកំពូលបានបង្ហាញពីការតស៊ូអំណាចជាសាកលលើបញ្ញាសិប្បនិម្មិត AI ដោយអឺរ៉ុបចង់បានច្បាប់ដែលតឹងរ៉ឹង និងការផ្តល់មូលនិធិជាសាធារណៈ ខណៈប្រទេសចិនកំពុងពង្រីក AI ដែលគាំទ្រដោយរដ្ឋខ្លួនឯង ហើយសហរដ្ឋអាមេរិកកំពុងឈានទៅរកវិធីសាស្រ្តទីផ្សារសេរីទៅវិញ។ លោក Macron បានចាត់ទុកអឺរ៉ុបជា "មធ្យោបាយទី៣" ដែលជាមូលដ្ឋានកណ្តាលដែលអាចគ្រប់គ្រង AI ដោយមិនញញើតក្នុងការច្នៃប្រឌិត ឬពឹងផ្អែកខ្លាំងពេកលើសហរដ្ឋអាមេរិក ឬប្រទេសចិនទៀតឡើយ៕